FRIEDRICH EBERT STIFTUNG

Целосна свртеност кон потребите во Mакедонија

Фондацијата Фридрих Еберт е основана во 1925 година. Таа го носи името на првиот демократски избран претседател на Германија кој починал во годината на основањето на Фондацијата. Во 1933 година Фондацијата е забранета од страна на Нацистите, а во 1947 година таа е повторно основана. Денес, Фондацијата „Фридрих Еберт” е активна во повеќе од 120 земји во светот.

„Активности во Македонија поддржани од Фондацијата, индиректно, започнаа во 1992 година”, ни рече раководителот на канцеларијата во Македонија г-ѓа Милинка Трајковска. „Инаку, канцеларијата во нашата земја е отворена во 1996 година”, додаде таа.

Севкупната програма на Фондацијата е свртена кон потребите на земјата. „Нашите партнери во Македонија се невладините организации, научните установи, министерствата, МАНУ и синдикатите”, не информираше г-ѓа Трајковска.

Фондацијата „Фридрих Еберт”, канцеларија во Скопје прави годишно прилагодување на целите и целните групи обидувајќи се да ги следи потребите на земјата. Поради тоа, заитересираните НВО, научни установи, министерствата како и синдикатите до крајот на ноември испраќаат предлози за активности во кои се дадени основните информации за активноста односно темата, целта и целната група. Во канцеларијата се сумираат барањата и се согледуваат потребите. На основа тоа се формулираат целите за следната година и со тие предлози Канцеларијата во Скопје аплицира во седиштето на Фондацијата.

„За тековната 2002 година формулирани се четири глобални цели”, ни изјави г-ѓа Трајковска. „Тоа се: политички прашања; социјалната димензија на стопанските вредности во Македонија; работата на синдикатите и хармонизација на етничкиот и националниот идентитет и развиваање на чувство за припадност на една држава.

Методите што ги користи Фондацијата во својата работа се најчесто семинари, округли маси, советувања обуки и сл. „На семинарите што ги организираме се обидуваме освен домашните релевантни личности да поканиме и гости од земјите во регионот кои имаат искуства со зададената тема но, и други странски експерти кои се специјализирани за некои од темите. Освен тоа, се обидуваме да ги публикуваме главните излагања од семинарите за да можат не само учесниците туку и другите заинтересирани да ги имаат при рака тезите и евентуалните решенија предложени на семинарот. До сега сме издале околу 20 публикации на различни теми”, ни рече г-ѓа Милинка Трајковска.

Освен локалните проекти Фондацијата „Фридрих Еберт” учествува и во спроведувањето на регионални проекти кои се концентрирани на теми од областа на политиката на вработување, социјалната сфера и локалната самоуправа.