ЖЕНИ 

16 ДЕНА ПРОТИВ СЕМЕЈНОТО НАСИЛСТВО
БОРБАТА ПРОТИВ НАСИЛСТВОТО МОРА ДА ТРАЕ

Традиционално, светската акција “16 дена против семејното насилство”,  од 24 ноември до 11 декември, се одбележа и во Македонија.
СОЖМ организира повеќе дебати, трибини, тркалезни маси и работилници. Првата дебата беше одржана во Скопје на 27 ноември, на темата “Насилството како факт или фикција”, со претставнници од НВО, од Филозофскиот факултет од Скопје, пред с$ од групата за социјална работа и политика, од Министерството за труд и социјална работа и други гости. Министерот за труд и социјална политика, г. Јован Манасиевски, на оваа дебата ја промовира брошурата “16 дена борба против насилството”.
СОЖМ спроведе активности и во другите градови - во Струга беше одржана дебата на тема: “Толеранцијата како фактор за успешно живеење”, наменета за ученици од средното образование; во Велес  беше одржана трибина, а во Охрид тркалезна маса. Во Скопје на втори декември  беше одржана трибина на тема “Насилството врз жените” .
- Многу е важно да се спомене дека во рамките на нашата организација постои и работи СОС -телефонска линија и просторија каде што жртвите на насилство можат да се сместат. Најважно е да се стави крај на насилството, да се зголеми бројот на прифатилишта за прифаќање на жртвите и да се формираат одделни сектори во полицијата и судството кои ќе работат на решавањето на овој проблем, велат во СОЖМ. 
Здружението за еманципација, солидарност и еднаквост на жените – ЕСЕ организира Кампања за борба против семејното насилство насловена “Да сториме барем нешто”. Беа објавени резултатите од спроведеното теренско истражување со наслов “Темната бројка кај насилството врз жените во Република Македонија”. Според резултатите, меѓу останатото, 61,5% од жените во нашата држава се жртви на некој вид психичко насилство. ЕСЕ и другите организации членки на координативното тело за одбележување на “16 дена активизам за борба против семејното насилство”, на 25 ноември во хотелот “Холидеј ин” одржаа прес-конференција и отворена трибина на тема “Ретроспектива на активностите спроведени во областа на семејното насилство -Координирање на следните чекори на дејствување во оваа област”. Од 6 до 8 ноември, беше организиран семинар наменет за правници и адвокати кои во практиката се среќаваат со случаи на семејно насилство.
М.И.