ДЕМОКРАТИЈА И ЧОВЕКОВИ ПРАВА

НВО И ДАНОЦИТЕ

Подобрување на правната и на даночната рамка

Во рамките на проектот “Компаративен преглед на даночни закони” од Програмата за јакнење на невладините организации НА мцмс, на 17 декември 2002 година во Скопје се одржа трибината на тема “НВО и даноците кон заеднички развојни цели – подобрување на правната и даночната рамка”.
Околу прегледот на моменталната состојба во Република Македонија и споредбено со земјите во Централна и Источна Европа излагање имаше Славко Лазовски од Министерството за финансии. Посебен осврт даде на таксите кои ги плаќаат НВО и потребните измени, Данокот на додадена вредност и НВО и можноста за воведување на “Закон за 1%”, кој се состои во можноста на даночните обврзници 1% од данокот кој треба да го платат, да го насочат кон некоја НВО, која најдобро ќе ги остварува очекуваните цели и интереси на даночните обврзници. 
Сашо Клековски, извршен директор на Мцмс, зборуваше за потребните промени во правната и фискалната рамка за НВО. Тој истакна дека има потреба од мобилизација на домашни извори, бидејќи очекувано е странските донации да се намалуваат. Токму зависноста од странските донации е најголемата критика која се упатува до невладиниот сектор. Во таа насока потребни се даночни олеснувања со кои би се поттикнале даночните обврзници да донират во НВО. Меѓутоа даночната регулатива која постои тоа го оневозможува.
“Првата потребна измена се однесува на можноста здруженијата на граѓани и фондации да се бават со стопански активности” рече Борче Давитковски, професор на Правниот факултет. Тој ги истакна конкретните предлози кои се однесуваат на измени на правната рамка за НВО, поточно измените кои би се направиле во постоечкиот Закон за здруженија на граѓани и фондации.  “Исто така треба да се разработи членот 3 кој се однесува на попрецозно определување на неможноста за политички активности на здруженијата на граѓани и фондации”, рече меѓу другото Давитковски.
Како клучна измена тој ја посочи потребата од внесување нова глава во Законот, која би се ондесувала на Организации од јавна корист. На трибината воведничари беа и Ленка Петковска од Министерството за финансии, Виолета Сеизова од Управата за јавни приходи и Весна Пендовска, професор на Правниот факултет. На трибината учествуваа претставници на здруженија на граѓани кои делуваат во различни сектори.              Г.Ш.