Еколошка негрижа

Загадувачите не се плашат од инспекторските пријави

Прекршочните или кривичните пријави на еколошките инспектори упатени до зага­дувачите на човековата околина не прет­ставуваат никаква закана. Минатата година, од страна на Државниот инспекторат за животна средина, заради зголемен степен на еколошка деградација на земјиштето, зага­дување на воздухот, на површинските и подземните води, фрлање смет на несо­одветни места и зголемена бучавост, биле поднесени 179 решенија за отстранување на недостатоци, 65 прекршочни пријави. Десет индустриски и угостителски објекти времено биле затворени, а за непочитување на решение на овластен орган била поднесена и кривична пријава. Инспекторатот извршил вкупно 990 контроли на теренот.

Влатко Серафимов, директор на Државниот инспекторат за животна средина, укажува на фактот дека  прекршочните пријави за загадувања на животната средина несо­одветно се третираат од страна на судовите и најчесто тие  предмети застаруваат. Поразителен е и фактот што  минатата година до Инспекторатот нема ниту една повратна информација за решен предмет.

„На ова поле, години наназад не е сменето речиси ништо”, вели Серафимов. Знаејќи за судската бавност, загадувачите не се плашат од пријавите што им ги поднесуваат инспекторите. Ниските казни и судската неажурност се во полза на загадувачите. Целата држава ја покриваат вкупно осум еколошки инспектори, што е премалку”

Од Државниот инспекторат за животна средина очекуваат подобрување во работата по децентрализацијата на власта, кога секоја локална самоуправа мора да има и одделение за животна средина, задолжено за откривање на загадувачите на животната средина.

Д.М.